Alabak argazki-kamera berria du eta zaharra, noski, aitatxorentzat izan da. Beraz, orain neuk ere kamera daukadanez, nire azken txangoko argazkiak jartzea erabaki dut.
Hementxe ba, mendizale bakarti baten irudi batzuk.
TXANGOA: Orreaga - Lindux - Aizperri - Mendiaundi - Menditxipi - Askaxarreta/Menditxuri - Xuringoa - Orreaga.
DATA: 2012ko ekainaren 16a.
IRAUPENA: 4 ordu.
DISTANTZIA: 14 kilometro, gutxi gorabehera.
Orreagatik atera naiz
Nahiz oso goiz izan erromesez lepo zegoen. Argazkiak egin dizkiet bi txirrindulari asturiarrei eta lehenbailehen egin dut ospa inguru turistikotik.
Ibañetara joan naiz Santiagorako bidetik, mendian zehar.
Beti izan dut gustuko (kisch samar -edo dexente- izan arren, onartzen dut) Orreagako guduaren oroigarria, baina memeloren batek kateak lapurtu dizkio eta, baldintza horietan, uko egin diot argazkia ateratzeari. Ibañetan, noski, turistak eta erromesak, horietako bat ermita ondoan kanpatuta.
Orreaga eta Ibañeta ezagutzen nituen, baina hemendik aurrera dena da berria niretzat.
Ibañetatik Gararbideko lepora igo naiz. Hemendik erretiratu omen ziren karlistak Auritzetik. Hortik ikuspegi ederra dago. Astobizkar, suposatzen dut, nahiz eta paraje hauek ez ezagutu.
Ikusten ditudan mugarrietan Luzaide eta Auritz arteko muga agertzen da: alde batean B jartzen baita (Burguete) eta bestean V (Valcarlos).
Laster bunker bat ikusten dut (gehiago ikusiko dut txangoaren zehar, garai latzen testigantzak...). Bunker horren ondotik ateratzen omen da Atxistoi, Laurinaga, eta abarrera joateko bidea. Beste egun batean egingo dut!
Hortik ateratzean izugarrizko suertea izan dut eta oreinkume bat ikusi dut, asaldatuta berehala ihes egin duena.
Pixka bat gehiago igo eta kanadar pasabidea zeharkatuz gero Iparraldean omen gaude. Hortik ikusten da Linduxerako igoera, landatutako pago gaztez beteta.
Aldapa igo eta Linduxeko tontorra. Hondoan Hautza eta behean Aldudeko ibaia.
Eta orain, Linduxetik zenbait ikuspegi. Laurinaga (uste dut):
Adi, Iturrunburu, Beodegi, Sorotepo:
Eta
hartuko dudan bidea. Ataloztiko lepoa, Mendiaundi, Menditxipi eta Askaxarreta
(Menditxuri ere deitua) ikusten dira.
Uztartetako
kaskora igo eta ikuspegi ederra dago: Albako Harria, Aldudeak, Hautza…
Aizperriko tontorra. Iturrunburu eta
Adi oso dotore.
Zaldi hau ez da larre hauetaz gehiago gozatuko. Putreek bai egin dutela betekada ederra haren lepotik!
Mendiaundiko tontorra. Aurrean,
Askaxarreta. Zalantzatan ibili naiz, Txasperrora joan ala ez, eta azkenean ez
joatea erabaki dut. Hurrengo batean izango da!
Askaxarreta eta Pirineoak.
Larre bukolikoak.
Menditxipiko
tontorra. Askaxarreta hurbilago agertzen da eta, behean, Auritzeko bailara.
Askaxarretako
(Menditxuriko) tontorra. Orreaga ikusten da.
